ஒளியின் மகனான குழந்தை இயேசு பாலகனின் பிறப்பு விழா உலகம் முழுவதும் கொண்டாடப்பட்டு வரும் நிலையில் மட்டக்களப்பு மாநகர சபையின் 2024 ஆண்டிற்கான ஒளி விழா (18) திகதி மட்டக்களப்பு நகர மண்டபத்தில் வெகு விமர்சையாக இடம் பெற்றது.
மட்டக்களப்பு மாநகர சபையின் ஆணையாளர் எந்திரி நா.சிவலிங்கம் அவர்களது தலைமையில் நடைபெற்ற நிகழ்வில் பிரதம அதிதிகளாக கிழக்கு பல்கலைக்கழகத்தின் சிரேஸ்ட விரிவுரையாளரும் அருட்தந்தையுமான அ.நவரெட்ணம் (நவாஜி) அடிகளார் மற்றும் சீயோன் தேவாலயத்தின் உதவிக் குரு க.திருக்குமரன் அடிகளார் ஆகியோர் கலந்து சிறப்பித்தனர்.
மட்டக்களப்பு மாநகர சபையின்
கணக்காளர் கே.அரசரெட்ணம், ஆயுள்வேத வைத்தியர் லாவண்யா, பொறியியலாளர் திருமதி.சித்திராதேவி மற்றும் நிருவாக உத்தியோகத்தர் உள்ளிட்ட மாநகர சபையின் உத்தியோகத்தர்கள், உத்தியோகத்தர்களின் பிள்ளைகள் என பலரும் கலந்து கொண்டு நிகழ்வை சிறப்பித்திருந்தனர்.
அதிதிகளுக்கு வரவேற்பளிக்கப்பட்டதனைத் தொடர்ந்து மங்கள விளக்கேற்றலுடன் ஆரம்பமாகிய நிகழ்வில் மாணவர்களின் கலைப்படைப்புக்கள் அரங்கை அலங்கரித்திருந்ததுடன், அதிதிகள் உரை இடம்பெற்று, உத்தியோகத்தர்களின் பிள்ளைகளுக்கும் கலைப் படைப்புக்களை அரங்கேற்றிய சிறார்களுக்கும் அதிதிகளினால் பரிசில்கள் வழங்கி மகிழ்விக்கப்பட்டமையும் குறிப்பிடத்தக்கது.
